Manfred Blechschmidt, Erla

 
Namm dir fei Zeit
bleib immer e Mol stieh
tu dich besinne
kimmst aah dorten hi
wu de willst,
denn mit Eil un Hast
hot mannicher in senn Laabn
oft`s Schennste verpasst!

Anton Günther

S is doch su, hat aans e bissel freie Zeit
heest furt när furt vom Schuss.
S is när bluß e Katzensprung bis rüber zen Kaukasus,
dreima hiefliechen bis de am Balaton.
Fuffzn ma schneller als frieher miet Zeppelin un Luftballon
bis de miet dr Ärlein abgesurrt.
Drimm heest im Urlaub furt när furt.

Doch aans soch iech dir, has de diech uffgerafft uf gruße Ras zue giehn,
kenn unnerwaags ka Gegammel,
wierch übern Fluchplatz nüber, de Gängweh nauf mit viel Gerammel,
erkämpf dr brutal enn Fansterplatz,
hau dann, danns net paßt mit de Ellebochen aans vorm Latz.
Setzsch in dr Maschin glei hinner dr Kanzel, rück e brat ans Fanster no
da has de vom Fliechen erscht was davu.

Un noch ewas, gieh modern gekleidet,
komm epper net miet so en ausgefransten, ausgeblachten, türmlichen arzgebirgischen Gifterhietel,
das mar denkt, du wärscht dr Großknacht vom öberschdorfer Pflaumedietel.
Hau dir ganz lässich ne moderne Mitz uffn Kopp
de Gack trach uffen, aufsässich, s’ Hemd hartgemalter Popp.
Enne Sunnbrill, mechlichst ne gruße, die schafft Effekt,
da siehste aus wie e südamerikanisches Rieseninsekt.

Nu haat epper keene Wut wie iech schu ieberall gewaasen bie
uffn hechsten Barch un im tiefsten Tol.
Iech war im Ural.
Iech war in Rila, iech war in dr Tatra, iech war im Altai
Himalaja, Vidoscha, s war alles drbei.
Iech war in Baku, in Tblissi, in Samarkand,
iech bie in Alma Ata un Odessa rimgerannt.
Iech hob geschlofen in runde mongolische Lederjurten,
iech tat durch Ulan Bator spurten.
Baltschik, Varna, Nessebar
red mar garnich meer dafu, do war iech schu vor fuffzn Gar.
Iech war uffn Jeschken, iech war uffn Zvolen,
iech war in Ungarn, iech war in Polen.
Wie meine Husentasch kenn iech Banska Bystritza,
iech kenn Domanorska Dolina,
iech kenn Transka Lomnica, kenn Bulgaria Aleko Stasliwizka.
Iech kenn Transjanske Teplicee, iech kenn Stara Horo Smokovee,
nie wieder sauf iech do Kaffee, denn hinnerhar gangs Herz net me.

Dann gings schnell noch zu Kur, drei Wochen lang privat, Marianske Lazne.
Un mei Fraa saat, hast nu ausgespannt, he.
Iech hob miech eigeschifft uff sämtlichen Dnepr- un Wolga-Schiffen
die klaanen Rundrumschiffereien in dann Donauhäfen mit eibegriffen.
Wann iech veraast bie, iehr Leit, dos war efach toll,
alla bie iech furt, hämm bie iech vull.

Iech war in Mamaia, iech war in Zynaia,
iech war mit men Freind Hardy
drei Wuchen in Samardi.
Iech hob geschlofen übern Polarkreis, uff enn zammgeklapperten Lappland-Schlieten,
iech hob geschlofen in Ägypten uff dann spitzischen Pyramieden.
Iech bie hinnerhar uff so enn zweesitzigen Kamel gerieten.
Iech hob geboden im Amur, im Baikal, im weißen un im blauen Nil,
abber Leitle, aans wär mar halt ze viel,

Uffn Fichtelbarch rimharzeeiern.
Iech bie net von gastern, iech mecht mit was teiern
vor meen Kollegen, vor meen Nachbarn renomieren.
Wandern durchs Arzgebirg, iech tu miech doch net blamieren, schenieren.
Iech bie halt für e fürnahmes Getu
iech grieß a net mee Glück Auf, iech sa Hello, Solong, Dobre Den, Haudujudu.

Ierch rachne miech gewissermaßen net mee zen Mob.
Iech bie, wie mar saacht, moderner Snob.
Bluß mei Fraa saat, mir fahlt e Radel im Kopp.

Iech tät rimharloofen wie e eigebilder, aagebutzter, halbalberner Zirkuscloon.
Sowas hätt se sich solln frieher ma getraue ze saan,
frieher, de Fraa ze iehrn Maa,

frieher, vor dar Emanzipation !!

Werner Kempf

1. Wenn deine Fraa mol wattern tut.
iech waß, dos is net schie
doch bleib´r fei derwagn racht gut
es ka net ewig gieh!

2. De horchst am besten gar net drauf
un tust, als wär nischt lus.
Se härt bestimmt aah wieder auf,
drüm mach kenn grußen Ruß!

3. De Weibsen brauchn dos ab un zu.
se könne sist net labn.
se gabn dernooch aah wieder Ruh,
dos muß mer ne vergabn.

4. Es kimmt, un niemand waß, wuhar.
Ganz gahling fängt´s abn a.
Es gieht´r irgendwos derquar -
un schuld dra is der Ma!

5. Doch wenn`s aah stürmt un kracht.
es gieht gewieß vorbei!
Noort werscht de wieder agelacht,
un`s ka net schönner sei.

6. Drüm, wenn dei Fraa mol wattern tut,
wart, bis se ausgeredt!
Un bleibr fei darwagn racht gut -
ze streiten luhnt sich net.

Karl Hans Pollmer