Heit is dr heilge Obnd ihr Maad,
kummt rei, mer gießn Blei
Fritz laaf geschwind zer Hannelies,
se sull bezeiten rei.
 

Iech giß fei erscht, wos krieg iech do,
sat a enn Zwackenschmied.
De Karli lacht, die denkt wuhl gar
iech maan ihr'n Richter Fried.
 

Was gicht da über Schwammetopp?
Nu, Hener ruhst noch net.
Nu wart när bis dr Vater kimmt,
mußt waarich nauf ze Bett.
 

Na horcht när mal im Ufentopp,
dos Rumpeln un dos Geigen,
Na wall's när net noch winseln tut,
bedets a kaane Leichn
 

Bei eich do drübn muß a schie sei,
ihr hatt e Sau geschlacht.
Ne Lechter hatt ihr agezünd,
dos is e wahre Pracht.
 

Du dummer Gung, bill dir nischt ei,
du warst dr nischt drhuln.
Iech ruff eich schu ne Rupprich rei,
dar mag eich fest versuhln.
 

Iech zieh geleich is Bargwark auf,
nu kumme se marschiert
De Bargleit schreie Gelück auf,
wie sich dar Steiger rührt.
 

In Arzgebirg is warrlich schi,
wenn's draußen stürmt un schneit
Un wenn de Peremett siech dreht,
is unner schennste Zeit.

Dr Sauerkraut- un Weihnachtsduft
durchzieht is ganze Haus.
Dos is e rachte Weihnachtsluft
beim Heilig-Obnd-Schmaus
 

Dr Haarig is de Hauptsach fei
von daare Kocherei.
Un war kenn Haarig assen ka,
dar muß net richtig sei.
 

Ihr Kinner brengt de Lichter rei,
dr Obnd bricht nu a.
Un tut se in de Tille nei,
nort brennt eich a nischt o.
 

War hat do Karzle agebrinnt,
macht net su viel Gestank
De Mutter tut de Kließ schu nei,
nu dauerts nimmer lang.